Калі елкі былі вялікімі

Выстава-кірмаш «Калі елкі былі вялікімі …» працуе ў Выставачнай зале Магілёва ад 10 снежня. Пераднавагоднім зместам напоўнілі яе вырабы магілёўскіх рамеснікаў грамадскага аб’яднання «Шчыра майстэрня»: навагоднія цацкі, гірлянды, падарункі, сувеніры, разнастайныя елкі і ялінкі, паштоўкі, абярэгі, лялькі.

Адметнай асаблівасцю выставы-кірмашу стала экспазіцыя фотаздымкаў, на якіх адлюстраваны шчаслівыя моманты святкавання Новага года ў дзяцінстве. У гэтай частцы пераднавагодняга праекта прынялі ўдзел магілёўцы, падзяліўшыся дарагімі сэрцу фота з сямейнага альбома.

Падчас працы выставы пройдуць майстар-класы, у якіх возьмуць удзел вядомыя магілёўцы, якія рэалізавалі сябе ў розных сферах дзейнасці. Напрыклад, скульптар Андрэй Вараб’ёў, стваральнік магілёўскіх львоў, Павел Марыненка – намеснік камітэта эканомікі Магілёўскага аблвыканкама, Ала Галушка – намеснік старшыні Магілёўскага гарвыканкама. Яны будуць разам з рамеснікамі майстраваць эксклюзіўныя навагоднія цацкі, якімі ўпрыгожаць елкі выставачнага залы.

Выстава працуе да 25 снежня.